Tge sa zuppa davos il video cun il president da la Regenza Marcus Caduff sin il BMX? Ina campagna chantunala cun in cler messadi: Giuvenils tranter 12 e 25 onns duain sa participar activamain a l'elavuraziun d'ina nova lescha davart la politica d'uffants e da giuvenils. Il punct culminant da l'acziun è l'occurrenza publica «Dialog per l'avegnir - giuventetgna e lescha» ils 17 da matg 2025 a Glion.
Cun in tschegn d'egl e gronda derasaziun sensibilisescha il chantun Grischun persunas giuvnas per in tema serius: lur responsabladad e lur cooperaziun per concipir la politica d'uffants e da giuvenils. Il video ch'è vegnì publitgà ordavant cun il president da la Regenza Marcus Caduff n'ha betg mo procurà per discussiuns en las medias socialas, mabain è in cler signal: Ils giavischs da la giuventetgna èn dumandads – e lur vusch quinta.
En il focus stat ina nova lescha chantunala davart la politica d'uffants e da giuvenils che vegn elavurada ils proxims mais. En quest connex duain la realitad da viver, ils basegns e las ideas da las persunas giuvnas vegnir integrads directamain en la legislaziun. «Giuvnas e giuvens dad oz èn las persunas creschidas da damaun – cun lur perspectivas enritgeschan els essenzialmain la discussiun politica», di il president da la Regenza Marcus Caduff, schef dal Departament d'economia publica e fatgs socials. «Perquai èsi immediat stà cler per mai che jau prend part a questa acziun. Sche nus vulain che nossas leschas sa drizzan vers l'avegnir, stuain nus prender serius las vuschs da la giuventetgna. Lur vista sin il mund è preziusa – e lur responsabladad cumenza ussa.»
A l'occurrenza publica «Dialog per l'avegnir - giuventetgna e lescha» ils 17 da matg a Glion survegnan giuvnas e giuvens la pussaivladad da discutar lur ideas cun autras persunas giuvnas sco er cun represchentantas e represchentants da las vischnancas e da las scolas. Lur ideas e lur contribuziuns pon ellas ed els inoltrar gia ordavant online sut gr.ch/jugend. Ultra da quai han lieu en pliras regiuns lavuratoris preparatorics.
Il video e la schliaziun latiers èn sapientivamain portas tar la cultura da giuventetgna. Els mussan: La politica sa er auter – direct, surprendent e sin medem nivel. Cun il tema principal «Concepir. Sa participar. Sa mover.» («Mitgestalten. Mitreden. Mitbewegen.») ha la campagna la finamira d'integrar activamain la giuventetgna. L'introducziun plain umor mussa: Oz vegn muventà in politicher, damaun pos ti muventar la politica. Davos quest tschegn d'egl stat in cler messadi: L'avegnir vegn concepì oz – e per quai dovri la vusch da la giuventetgna. Tgi che vul participar a la discussiun, sto er gidar a concepir. Uss è il mument da surpigliar responsabladad, da purtar atgnas ideas e da stgaffir cuminaivlamain la basa per ina lescha ch'illustrescha il mintgadi da las persunas giuvnas. Dal rir vai uss vers cundecider.
Davos la campagna stat l'Uffizi dal servetsch social dal Grischun (USo), ch'è responsabel per la politica d'uffants e da giuvenils. Cun l'access nunconvenziunal vul l'uffizi cuntanscher persunas giuvnas là, nua ch'ellas sa movan – en il spazi digital, cun umor, surpraisa e relevanza. La finamira è quella da svegliar interess e da sbassar las retegnientschas envers la cooperaziun politica. Mo tgi che sa senta prendì serius, sa participescha. Cun l'acziun spera l'Uffizi dal servetsch social dal Grischun betg mo blers inputs creativs per la nova lescha, mabain er da pudair rinforzar persistentamain la participaziun politica da persunas giuvnas en il Grischun.
Infurmaziun per la redacziun:
Il video da schliaziun cun il president da la Regenza Marcus Caduff stat a disposiziun a partir d'immediat e dastga vegnir duvrà en connex cun la rapportaziun.
Ulteriuras infurmaziuns davart la campagna ed il video da schliaziun:
Contact per las medias:
- Susanna Gadient, manadra da l'Uffizi dal servetsch social, tel. +41 81 257 26 51 (cuntanschibla da las 10.30 fin las 11.30), e-mail Susanna.Gadient@soa.gr.ch