Tge spetgan atgnamain ils giuvenils d'ina lescha d'uffants e da giuvenils? Questa dumonda è stada en il center dal lavuratori «Giuventetgna e lescha» ch'è vegnì organisà dals 4 d'avrigl fin ils 17 da matg 2025 en tut las regiuns linguisticas dal Grischun.

En rundas da discussiun cun moderaziun n'han ils giuvenils betg mo survegnì ina invista dals process politics e da la legislaziun, mabain er pudì exprimer activamain lur giavischs. Ils giuvenils han formulà, tge che als fatschenta, tge ch'els giavischan e nua ch'els vesan largias u in basegn da meglieraziun. A chaschun da l'occurrenza finala «Dialog per l'avegnir – giuventetgna e lescha» a Glion èn ils discurs lura vegnids manads vinavant ed approfundads ensemen cun represchentantas e represchentants da las vischnancas e da las scolas.

En il center è stada la dumonda, co ch'ils giuvenils vulan sa far valair en l'avegnir en ils process politics e tge cundiziuns generalas ch'èn necessarias per quest intent. Tranter auter han ins discutà davart la dumonda da la cooperaziun concreta sin ils differents plauns. Er differents formats da participaziun, sco sessiuns da giuvenils, parlaments da giuvenils, il dretg d'inoltrar intervenziuns, il dretg da votar a partir da 16 onns, u divers instruments specifics per projects, sco credits per giuvenils e gruppas da lavur, èn vegnids tractads en moda critica. In ulteriur accent han ins mess sin la dumonda, co che giuvenils vulan vegnir infurmads – e tge ch'i dovra per che las infurmaziuns als cuntanschan propi. Tge sustegn dovran ils giuvenils per iniziar midadas e per far valair efficaziamain lur giavischs?

Las represchentantas ed ils represchentants da las vischnancas e da las scolas han discutà davart la rolla da la politica communala per la promoziun e per la participaziun dals uffants e dals giuvenils. Las participantas ed ils participants han discutà davart las schanzas e sfidas ed han formulà basegns concrets per sviluppar vinavant la politica d'uffants e da giuvenils sin plaun local.

Il dialog davart la participaziun politica da persunas giuvnas na finescha dentant betg cun il Dialog per l'avegnir a Glion. Las enconuschientschas ch'ins ha rimnà vegnan ussa evaluadas sistematicamain ed integradas directamain en l'elavuraziun da la nova basa legala. Uschia gidan las vuschs dals giuvenils concretamain a sviluppar vinavant la politica chantunala d'uffants e da giuvenils.